नयाँ सिजनको सुरुको दुई खेलमा लगातार पराजित भएको फ्रेन्च लिग वान क्लब पेरिस सेन्ट–जर्मेन (पिएसजी) त्यसपछिका खेलमा लगातार विजयी भएको छ ।
लिग अन्तर्गत आइतबार राति भएको खेलमा पिएसजीले निसमाथि ३–० को जित दर्ता गरेको छ । कोरोना भाइरसबाट संक्रमित भएका कारण लिगको सुरुका तीन खेल गुमाएका केलियन एमबाप्पे आइतबार रातिको खेलमा पिएसजीको टिममा थिए ।
संक्रमण मुक्त भएपछि मैदान फर्किएका एमबाप्पेले ३८ औँ मिनेटमा पाएको पेनाल्टीमा गोल गरी पिएसजीलाई सुरुवाति अग्रता दिलाए । पहिलो हाफको इन्जुरी समयको पहिलो मिनेटमा एन्जल डी मारियाले गोल गरी अग्रता दोब्बर बनाए ।
६६ औँ मिनेटमा डी मारियाको सहयोगमा मार्क्वीन्होसले गोल गरेपछि पिएसजी ३–० ले विजयी भयो । यो खेलमा पिएसजी नेइमार बिना थियो । अघिल्लो खेलमा रातो कार्ड पाएका नेइमारमाथि दुई खेलको प्रतिबन्ध लागेको छ ।
