गत मंगलबार भएको ४६ औँ अमेरिकी राष्ट्रपति निर्वाचनमा डेमोक्र्याटिकका तर्फबाट जो बाइडेन निर्वाचित हुने निश्चित भएको छ।
२० इलेक्टोलर सिट भएको पेन्सेल्भिनियामा बाइडेनले सहज अग्रता बनाएसँगै राष्ट्रपतिमा उनको चयन निश्चित भएको सिएनएनले बताएको छ।
११ सिट भएको एरिजोना र ६ सिट भएको नेभाडामा बाइडेन सहज अग्रतामा छन्। १६ सिट भएको जर्जियामा भने उनी झिनो मतका साथ अग्रस्थानमा छन्।
वर्तमान राष्ट्रपति डोनाल्ड ट्रम्पले अघिल्लो निर्वाचनमा जित हासिल गरेका विस्कन्सिन र मिसिगन जितेसँगै बाइडेनका लागि ह्वाइट हाउसको यात्रा सहज बन्दै गएको थियो। अघिल्लो पटक ‘रेड’ राज्य बनेका विस्कन्सिन, मिसिगन र पेन्सेल्भिनियालाई बाइडेनले ‘ब्ल्यु’ बनाएका छन्।
उनीसँगै अमेरिकाले पहिलो अश्वेत उपराष्ट्रपतिका रुपमा कमला ह्यारिसलाई पनि पाएको छ। उनी केरलियन आमाकी छोरी हुन्।
बाइडेनले शुक्रबार राति डेलावरमा राष्ट्रलाई सम्बोधन गर्ने पनि सिएनएनले लेखेको छ।
