कोरोना भाइरस महामारीको हालको इपिसेन्टर दक्षिण अमेरिकी देश ब्राजिलका राष्ट्रपति जायर बोल्सोनारोले सार्वजनिक स्थानमा अनिवार्य रुपमा मास्क लगाउनु पर्ने कानून स्वीकृत गरेका छन् ।
यो कानून लागु भएसँगै अब ब्राजिलका नागरिकले सार्वजनिक स्थानमा जाँदा वा घर बाहिर निस्कँदा अनिवार्य रुपमा मास्क लगाउनु पर्ने भएको छ ।
तर उनले चर्च, स्कूल, पसल तथा उद्योगमा पनि मास्क लगाउनु पर्ने व्यवस्थामा भने भिटो प्रयोग गरेका छन् । यस्ता स्थानमा मास्क अनिर्वाय गर्दा त्यसले सम्पतीको अधिकार हनन् हुने बोल्सोनारोको दाबी छ ।
यस्तै जोखिममा रहेको समूहलाई सरकारले मास्क उपलब्ध गराउनु पर्ने तथा व्यवसायिक फर्महरुले तिनका कर्मचारीलाई मास्क दिनु पर्ने व्यवस्थामा पनि बोल्सोनारोले भिटो लगाएका छन् ।
अमेरिकामा जस्तै ब्राजिलमा पनि मास्क विवादास्पद बनेको छ र कतिपय अवस्थामा राजनीतिककरण पनि भएको छ ।
अमेरिकाका राष्ट्रपति डोनाल्ड ट्रम्प जस्तै बोल्सोनारो पनि मास्कको लगभग विपक्षमा छन् र उनले पनि ट्रम्पले जस्तै कोरोना भाइरसलाई सामान्य रुपमा लिँदै आएका थिए । बोल्सोनारोले निकै कम समय मात्रै मास्क लगाएका छन् ।
कोरोना भाइरसको संक्रमण तीव्र गतिमा बढिरहेको भए पनि गएको महिनादेखि नै ब्राजिलका शहरहरु खुला गर्न थालिएका छन् ।
दक्षिण अमेरिकामा सबैभन्दा धेरै जनसंख्या भएको ब्राजिल कोरोना भाइरसबाट विश्वमा सबैभन्दा बढी प्रभावित हुने देशको सूचिमा अमेरिकापछि दोस्रो स्थानमा छ ।
ब्राजिलमा अहिलेसम्म झण्डै १५ लाख मानिसमा संक्रमण पुष्टि भएकोमा ६१ हजार पाँच सय भन्दा बढीको ज्यान गएको छ ।
बिहीबार ब्राजिलमा ४८ हजार भन्दा बढीमा संक्रमण पुष्टि भएको थियो भने झण्डै १२ सयजनाको ज्यान गएको थियो ।
ब्राजिलको सबैभन्दा बढी प्रभावित रियो दि जेनेरियो शहरमा पछिल्ला दिनमा संक्रमण केही कम हुने क्रममा रहेको छ ।
