भारतको बिहारसँग सिमा जोडिएका जिल्लाहरुमा भारतीय बजारबाट नियमित रुपमा खाद्यान्न र तरकारीहरु खुला रुपमा आइरहेका बेला बिहारमा भने कोरोना संक्रमितहरुको संख्या दिनदिनै बढेर गएको छ । बिहारमा मात्रै अहिले केही समय अगाडिको तथ्यांक अनुसार ४७१ जना फेला परेको भारतीय सञ्चार माध्यम अमरउजालाले अनलाइन संस्करणमा लेखेको छ । भारतमा सबैभन्दा बढी महाराष्ट्रमा ११५०६,
गुजरातमा ४७२१, दिल्ली ३७३८, मध्यप्रदेश २७१९, राजस्थान २६६६, उत्तरप्रदेश २३२८, तमिलनाडु २६२६सहित कुल भारतमा ३७३३६ संक्रमितहरु फेला परेका छन् । संक्रमितहरुको दर हेर्ने हो भने यो इटाली र स्पेनको शैलीमा अगाडि बढिरहेको छ । दिल्ली गुजरात र महाराष्ट्रको तुलनामा कम देखिएपनि बिहारको झुपडीमा यो संक्रमण फैलँदैजाँदा त्यसले नेपालका तराईका जिल्लाहरुमा जोखिम बढाउँदै लगेको छ ।
भारतको राजधानी दिल्लीमा केन्द्रीय रिजर्व पुलिस फोर्सका १२२ जवान दुई हप्ताभित्रै कोरोना भाइरसबाट संक्रमित भएको समाचार संस्था पिटिआईले जनाएको छ ।
अझै पनि १०० जवानको रिपोर्ट आउन बाँकी रहेको जनाइएको छ । सिआरपिएफका जवान संक्रमित भएपछि चासो अधिक भएको छ । स्वास्थ्य मन्त्रालयले सिआरपिएफका प्रमुखसँग के कारणले जवानहरुलाई संक्रमित हुनबाट रोक्न सकिएन भनेर जानकारी लिएको खबरमा उल्लेख छ।
सिआरपिएफको ३१ बटालियन क्याम्प दिल्लीको मयूर विहार फेस–३ मा रहेका जवान संक्रमित भएका हुन् । सो बटालियनमा पछिल्लो दुई दिनमा संक्रमणको दर उच्च भएको जनाइएको छ । यो हप्ताको सुरुमा एक जवानको सफदरजंग अस्पतालमा निधन भएको थियो । शुक्रबार बटालियनका १२ जनामा संक्रमण पुष्टि भएको हो । दुई दिनअघि ४५ जना जवानमा संक्रमण पुष्टि भएको थियो ।
संक्रमित जवानको मंडावलीमा उपचार भइरहेको छ । सिआरपिएफएका एक पारामेडिकल स्टाफबाट जवानहरुमा संक्रमण फैलिएको आशंका छ ।
यो महिनाको सुरुवातमा ती पारामेडिकल स्टाफमा कोरोना भाइरसको लक्षण देखिएको थियो । अप्रिल २१ मा उनी संक्रमित रहेको पुष्टि भएको थियो । उनलाई दिल्लीको राजिव गान्धी अस्पतालमा भर्ना गरिएको थियो ।
अप्रिल २४ मा ९ जवानमा संक्रमण पुष्टि भएको थियो । त्यसको भोलिपल्ट थप १५ जनामा संक्रमण पुष्टि भएको थियो।
भारतमा पछिल्लो २४ घण्टामा अहिलेसम्म सबैभन्दा धेरै व्यक्तिमा संक्रमण पुष्टि भएको छ । कोरोना भाइरसका कारण भारतमा पछिल्लो २४ घण्टामा २२ सय ९३ जनामा संक्रमण देखिएको छ ।
