कमलामाई नगरपालिकाले कोरोना महामारीका बीच आफ्नो सातौं नगरपरिषदको तयारी तिब्र पारेसँगै असार १० गते नगरपरिषद गर्ने अन्तिम तयारी गरेको छ । तयारीका क्रममा आज संसदमा प्रतिनिधीत्व गर्ने नेपाली कांग्रेस, जनता समाजवादी पार्टी, राप्रपालगायतका दलहरुसँग आज बिहान छलफल गरेको छ । १० गते सार्वजनिक गर्ने नीति तथा कार्यक्रममा समावेश गराउने दिर्घकालिन योजनाहरुका विषयमा साझा धारणा बनाइएको बताइएको छ ।
कोरोना संक्रमणका बीच नगरप्रमुख खड्गवहादुर खत्रीले नगरपालिकाका १४ वटै वडामा पुगेर सर्वदलीय बैठक मार्फत योजनाहरु संकलन गरेका थिए । वडास्तरबाट आएका योजनाहरु छनोट सकिएपछि विभिन्न लक्षित समूह, राजनैतिक दल र सरोकारवालाहरुसँगको छलफललाई पनि तिब्रता दिएका छन् ।
हिजो मात्रै सत्तारुढ नेकपाका नेताहरुलाई बोलाएर समाजवादी विकासको मोडेल र योजनाहरु बारे सुझाव लिएको बुझिएको छ । नगरप्रमुख खत्रीले यस अगाडि सत्तारुढ दलका नेताहरु, कांग्रेसका नेताहरु, शिक्षक, प्राध्यापक, किसान, महिला, दलित अपांग लगायतसँग छलफल गरेर लक्षित वर्गलाई पनि आफ्नो प्राथमिकतामा राखेको संकेत गरेका थिए । कमलामाई नगरपालिकाले कृषि, शिक्षा र स्वास्थ्यलाई पहिलो प्राथमिकतामा राखेको बुझिएको छ ।
