नेकपा एमालेका उपमहासचिव बिष्णु रिमालले कांग्रेसले गठबन्धन नगरी चुनाव जित्ने आत्मविश्वास गुमाइसकेकाले माओवादीसँगको गठबन्धनमा गएको बताउनु भएको छ ।
विकास र सम्बृद्धिका एजेण्डाहरु नभएका कारणले कांग्रेसको नेतृत्वले एक्लै निर्वाचनमा जाने आत्म विश्वास गुमाएको नेता रिमालले टिप्पणी गर्नुभएको हो । प्रेस चौतारी नेपाल सिन्धुलीले आयोजना गरेको पत्रकार भेटघाट कार्यक्रममा अन्य दलहरुले एजेण्डाको रुपमा नेकपा एमालेसँग प्रतिस्पर्धा गर्न नसकेर गठबन्धन गर्नु पर्ने बाध्यतामा पुगेको बताउनुभयो ।
‘एमालेले सुरुदेखिनैं के भनिरहेको छ, दलहरुले सिन्डिकेटको आधारमा होइन । माओवादी, कांग्रेस र समाजवादी पार्टी मिलेर बनेको गठबन्धन भने सिन्डिकेट एमालेसँग मिल्दा पवित्र हुने भन्ने हाम्रो मान्यता होइन’ उहाँले भन्नुभयो । एजेण्डामा जानु पर्छ, एजेण्डा के हो ? हाम्रो संविधानले समाजवाद उन्मुख भनेको छ । उहाँहरुको गठबन्धन रहेसम्म समाजलाई कसरी लैजाने भन्ने स्पष्ट दृष्टिकोण र योजना छैन । त्यसैले एजेण्डा बिहिन सरकारले देश बर्वाद पारिरहेको छ ।
माजवाद उन्मुख भन्ने मामिलामा कांग्रेस, माओवादी, नेकपा एस, जसपा, सिके राउत, उन्मुक्तिको धारणा एउटै हो त भन्ने प्रश्न उठेको बताउँदै नेता रिमालले अगाडि भन्नुभयोः ‘उहाँहरुको एजेण्डा के हो ? हामीहरु उहाँहरुको एजेन्डामा बहस गर्न चाहन्छौं । एजेण्डा मिल्यो भने हामी जिम्मेवार प्रतिपक्षका हिसावले सहयोग गर्छौं भनेर प्रष्ट भनेका छौं तर अहिलेसम्म त्यसरी आउनु भएको छैन ।
नेकपा एमाले एजेण्डाको आधारमा चुनाव लड्न चाहन्छ । र एजेण्डाको आधारमा जनताले भोट हाल्न पाउनुपर्ने उहाँको भनाई थियो । तर अहिले यातायात व्यबसायमा व्यापारीहरुले विगतमा लगाएको जस्तै राजनीतिमा पनि सिण्डिकेट लगाइएको टिप्पणीगर्दै नेता रिमालले अहिले मुल प्रतिस्पर्धी पार्टी एमाले र कांग्रेस मात्रै भएको बताउनुभयो ।
उहाँले अहिलेको प्रतिस्पर्धा पनि यही दलबीच भएको बताउनुभयो । उहाँले अगाडि भन्नुभयो,‘हामीले अहिले एजेण्डामा बसह गर्ने भनेका छौं तर कांग्रेस अहिले एजेण्डामा छैन । गठबन्धन गरेनौं भने चुनाव हार्छौैं भनेर लागिरहेको छ । चुनाव हार्ने र जित्ने एजेण्डाले हो दलले होइन । एजेण्डाका बीचमा प्रतिस्पर्धा हुन्छ । जसको एजेण्डाले जित्छ उसैले सरकार बनाउने हो, देश चलाउने हो । त्यसमा हामीलाई अनौठो लाग्ने कुरानैं छैन ।’
उहाँले माओवादीले अहिलेसम्म पार्टीको आकारसमेत नलिएको टिप्पणी गर्नुभयो । उहाँले भन्नुभयो,‘म माओवादीको टिप्पणी गर्न चाहन्न । माओवादीले अहिलेसम्म आकार नैं ग्रहण गरेको छैन । प्रचण्डजीको अहिले ३२ सीट छ ९० सीटलाई हल्लाएर खाइराख्नुभएको छ ।’ उपमहासचिव रिमालले भन्नुभयोः प्रधानमन्त्री बन्नु अगाडि प्रचण्ड हाम्रो एजेण्डामा सहमति जनाउनुभयो, त्यसपछि हामीले उहाँलाई समर्थन गरेका थियौं तर त्यसपछि उहाँले हाम्रो एजेण्डालाई छोडेर हिंड्नुभयो । एमाले निरन्तर एजेण्डा बोकेर हिड्ने पार्टी भएको उहाँले प्रष्ट पार्नुभयो ।
प्रेस चौतारी नेपालका जिल्ला अध्यक्ष बिनय दाहालको अध्यक्षतामा भएको कार्यक्रममा केन्द्रीय सदस्य एवम् जिल्ला इन्चार्ज प्रेम दाहाल, एमालेका केन्द्रीय सदस्य मनोजजंग थापा, कमलजंग राई, एमाले जिल्ला उपाध्यक्ष कणर् घिसिङ, नेता खड्गवहादुर खत्री, नेपाल पत्रकार महासंघका सभापति कृष्णहरी घिमिरे लगायतका नेताहरुको उपस्थिति रहेको थियो ।
