सात विद्यार्थी संगठनले लिए सुनील शर्मामाथि कालो मोसो दलेको जिम्मेवारी

मेडिकल कलेजको मनोमानीबिरुद्ध आन्दोलनरत सात विद्यार्थी संगठनले शुक्रबार सिंहदरबार परिसरभित्रै काठमाडौँ मेडिकल कलेजका कार्यकारी प्रमुख डा. सुनील शर्मालाई कालोमोसो दलेर गरिएको दुर्व्यवहारको जिम्मा लिएका छन्।

अभिभावक, विद्यार्थी र कलेज सञ्चालकहरुबीच शिक्षा मन्त्रालयमा भएको छलफलपछि बाहिर निस्कँदा विद्यार्थीहरुले डा. शर्मामाथि दुर्व्यवहार गरेका थिए।

काठमाडौँ मेडिकल कलेज, नोबेल मेडिकल कलेज र मणिपाल कलेजमा गत ४१ दिनदेखि चिकित्सा शिक्षाका एमबिबिएस, बिडिएस र बिएनएसका विद्यार्थीहरु मेडिकल कलेजको अतिरिक्त शुल्क, अनिवार्य होस्टललगायतका विषयमा आन्दोलनरत रहेको तर मेडिकल कलेजहरुले विद्यार्थीहरुलाई  डर, धम्की र परिवारलाई मानसिक तनाव दिएको विद्यार्थी संगठनहरुले उल्लेख गरेका छन्।

उनीहरुले शुक्रबार विज्ञप्ति प्रकाशित गर्दै शिक्षा मन्त्रालयमा शर्माले विद्यार्थी र अभिभावकहरुलाई हतोत्साहित गरेको र नोट अफ डिसेन्ट लेखेको भन्दै कालो मोसो दलेको जिकिर गरेका छन्। सात विद्यार्थी संगठनले यसको जिम्मेवारी लिँदै घटनामा पक्राउ परेका अनेरास्ववियुका उपमहासचिव महेश मास्के र स्थायी कमिटी सदस्य अमर पुनको रिहाइको माग समेत गरेका छन्।