नेकपाका शक्तिशाली अध्यक्ष एवम् प्रधानमन्त्री केपी शर्मा ओलीले आफूमाथि अर्का अध्यक्ष प्रचण्डले लगाएको आरोप सत्य ठहरिए आफू दुवै पदबाट हट्ने, असत्य ठहरिए प्रचण्ड अध्यक्षबाट हट्नुपर्ने बताएको तथ्य बाहिर आएको छ ।
लामो अडान तोड्दै बुधबारको केन्द्रीय सचिवालय बैठकमा सामेल भएका ओलीले प्रचण्डले गत कार्तिक २८ गतेको सचिवालय बैठकमा पेश गरेको प्रस्तावको खण्डन गर्दै त्यस्तो बताएका हुन्।
अध्यक्ष ओलीको सम्वोधनमा भनिएको छ: ‘यी आरोप या त सदर ठहरिनु पर्यो, अनि प्रधानमन्त्री र अध्यक्ष हट्नु पर्यो । यो आरोप सही ठहरिदैँन भने यस्तो आरोप लगाउनेले यसको जिम्मेवारी लिनुपर्यो, यसको जवाफदेहिता लिनुपर्यो।’
यस्तै ओलीले बहुमत या अल्मतलाई आफूले ‘फर्मल्ली’ नदेखेको अव यसमा जानुपर्ने अवस्था आएकोसमेत बताएका छन् ।
प्रचण्डको प्रस्तावले विगतका सहमति, समझदारी अन्त्यको घोषणा गरिसकेको भन्दै अब पार्टीमा नयाँ निकासको अभ्यास सुरु हुने पनि ओलीको भनाई थियो । अध्यक्ष ओलीको सम्वोधनमा अन्य सचिवालय सदस्यलेसमेत समर्थन जनाएको थाहा भएको छ ।
