अमेरिकी चुनावमा रुसको दखल प्रयासका सम्बन्धमा प्राप्त गुप्तचर सूचना लुकाउनका लागि होमल्याण्ड सेक्यूरिटी विभागका प्रमुखले आफूलाई दबाब दिएको उच्च गुप्तचर अधिकारीले बताएका छन् ।
चुनावमा रुसले दखल दिएको वा दिन सक्ने सूचना जस्ताको त्यस्तै सार्वजनिक गर्दा राष्ट्रपति डोनाल्ड ट्रम्पलाई ‘खराब’ देखाउने भन्दै विभागका नेतृत्वकर्ताले ‘डाउनप्ले’ का लागि दबाब दिएको ती गुप्तचर अधिकारीले बताएका हुन् ।
चुनावमा रुसी दखलसहितका अरु विषय तथा ह्वाइट सुप्रिमेसीको विषयमा सचेतनात्मक प्रतिवेदनको विश्लेषण नदिनका चाड वुल्फले दबाब दिएको ब्रायन मर्फीले बताएका छन् ।
आफूले गुप्तचर सूचना दिएकै कारण आफूलाई घटुवा गरिएको मर्फीले बताएको अमेरिकी सञ्चारमाध्यमले जनाएका छन् ।
गुप्तचर सूचना लुकाउन दिइएको आदेश गैरकानूनी रहेको उनले बताए ।
ह्वाइट हाउस र डिपार्टमेन्ट अफ होमल्याण्ड सेक्यूरिटीले आरोप अस्वीकार गरेको छ ।
गुप्तचर सूचना लुकाउनका लागि दबाब दिइएको भन्ने उजुरी सम्बन्धी जानकारी डेमोक्र्याटिक पार्टीको नेतृत्वमा रहेको सदनको गुप्तचर समितिले सार्वजनिक गरेको छ ।
समितिले मर्फीलाई संसदीय समितिको सुनुवाईमा उपस्थित हुन पनि भनेको छ । सन् २०१८ को मार्चदेखि २०२० को अगस्टबिचमा पटकपटक गुप्तचर सूचना सेन्सर गर्न खोजिएको अभियोग छ ।
