सिन्धुली जिल्लामा सलह किराको झुण्ड प्रवेश गरेपछि कमलामाई नगरपालिकाले त्यसको रोकथामका लागि पहल थालेको छ । नगरपालिकाको वडा नं. २ को खोल्माडाँडा, खोपी खर्क, चियाबारी, सिमबारी, लामीस्वारा, मुडेखर्क, खुर्सानीडाँडा, वडा नं. ८ को कर्करे माईस्थान र वडा नं. १० को भँडार, बाघमारा क्षेत्रमा सलह किरा समूहमा देखिएको नगरपालिकाको कषि शाखाले जनाएको छ ।
नगरपालिकाका उपप्रमुख मञ्जु देवकोटा र कृषि प्राविधिक देबी सापकोटा लगायतको टोलीले आज सलह किराको झुण्ड देखिएको ठाँउको स्थलगत निरिक्षण गरी अध्ययन थालेको छ । उक्त टोलीले आज नगर क्षेत्रका किसानसँग सलह किराको बारेमा छलफल गरी अध्ययन गरेको टोलीमा संलग्न प्राविधिक सापकोटाले जानकारी दिए ।
हावाको दिशा पछ्याएर १३० किमि प्रति घण्टासम्मको गतिमा समूह बनाएर उड्ने यी किराको बथानमामा ४ देखि ८ करोड सम्मको संख्या हुने बताईएको छ । आज कृषि मन्त्री घनश्याम भुसालले सिन्धुली जिल्लामा सलहको हुल प्रवेश गरेको र त्यो पहाडी जिल्लातर्फ अगाडि बढेको पत्रकार सम्मेलनमा बताएका थिए ।
किसानले लगाएको मकैमा सलह फट्याङ्ग्रा बसेर क्षती गर्न थालेको स्थानीयको भनाई छ । जिल्लामा पहिलो पटक आईपुगेको सलहले गरेको क्षति बारे केही खुल्न नसकेपनि यसको नियन्त्रण गर्न संवेदनसिल भएर लाग्नु पर्ने कृषि प्राविधिकको सुझाव छ ।
