सिन्धुलीको कमलामाई नगरपालिकाले आर्थिक वर्ष सकिनैं लाग्दा गरिएको योजना अनुगमनपछि उपभोक्ता समिति मात्रै होइन निर्माणको जिम्मा लिएका ठेकेदारहरुको मुटुमा कम्पन बढ्न थालेको छ । अघिल्ला अर्थिक वर्षमा अनुगमनमा खासै कडाई नगरेको कमलामाईले यस वर्षदेखी निर्माण सामाग्रीको प्रयोग मात्रै होइन लागत स्टिमेट अनुसारको काम भएको छ कि छैन भन्दै गैंची, गल र हम्मर प्रयोगगर्दै हेर्न थालेपछि कतै हाम्रो योजना पनि पास नहुने हो कि ? भन्ने कुराले ठेकेदार र उपभोक्ता समितिका पदाधिकारीहरु त्रसित बन्न थालेको देखिएको हो ।
शुक्रवार बिहान ९ः३० बजे योजना अनुगमन समितिको संयोजकसमेत रहनुभएकी उपप्रमुख मञ्जु देवकोटाले ‘हामी तपाईहरुको योजना अनुगमन गर्न आउँदै छौं, कागजपत्र लिएर कार्यस्थलमा आउनु होला’ भनेर फोन गरेको झण्डै ३० मिनेटपछि १२ लाख ५३ हजार रुपैयाँमा निर्माण गरिएको खिरखिरे सडक निर्माण उपभोक्ता समितिका अध्यक्ष डिल्लीप्रसाद घिमिरे मदनभण्डारी राजमार्ग छेउमैं आइपुगे ।
नर्सरीदेखी खिरखिरे हुँदै १४ नं. वडा कार्यालयसम्म जाने बाटो निर्माणमा कमलामाई नगरपालिकाले १० लाख रुपैयाँ रकम बिनियोजन गरेको थियो ।
उपप्रमुख देवकोटा सँगै गएका इन्जिनियर आस्तिक बरालले सडक निर्माणको स्टिमेटको बिबरणहेर्दै नापजाँच मात्रै गरेनन्, गल र हम्मरले बनाएको बाटो चेक जाँच गर्ने नाममा भत्काएनैं लगाए । नापजाँच गरेको देखेपछि जम्मा भएका स्थानीय वासिन्दा ढलान र नालाको वाल भत्काएको देखेर अचम्मितनैं बने ।
त्यसरी भत्काएको ढलान र वाल नापेपछि बरालले समितिका अध्यक्ष घिमिरे लगायतका पदाधिकारीलाई भने– तपाईहरुले तोकिए अनसारकै काम गर्नुभएको छ, भुक्तानीका लागि लिन आउनुहोला । नगर उपप्रमुखसँगै आएका इन्जिनियर बरालले गैंची, गल र हम्मरको सहायताले बनेको सडक भत्काएको देख्दा घिमिरेलाई लागेको थियो, अब हाम्रो भुक्तानी रोकियो, हामीहरु डुव्ने भयौं । तर बरालले तपाईहरुले बनाउनु भएको बाटो राम्रो र गुणस्तरिय छ भन्ने कुरा सुनिसकेपछि मात्रै स्थानीय खुशी भएका थिए ।
नेकपाका जिल्ला नेतासमेत रहनुभएकी उपप्रमुख देवकोटा भन्नुहुन्छ, मैंले यति राम्रो निर्माण अहिलेसम्म कतैपनि देखेको थिइँन, यहाँ त १ सय मिटर भन्दाबढी बाटो निर्माण गरेर उदाहरणीय काम गरेका छन् । क्वालिटी र कहिंकतै केही भन्ने ठाउँनैं छैन, क्वान्टीटीमा त स्थानीयले सबैलाई उदाहरणीय बनेर देखाईदिए, उहाँले अगाडि भन्नुभयो ।
निर्माण कार्यको क्वालिटी र क्वान्टीटी हेरिरहेका इन्जिनियर बराल अनुसार सबै स्थानीय उपभोक्ताले यसरीनैं काम गर्ने हो भने गाउँको विकास हुन समय लाग्ने छैन । उनी अगाडि भन्छन्ः कमलामाई नगरपालिका वडा नं. १४ मा निर्माण गरिएका २ वडा सडकले त्यस गाउँको मुहारनैं बदलिएको अनुभुति भइरहेको छ । रानीवासको १२ नं. वडाका दनुवार समुदायले जसरी उपभोक्ता समितिमार्फत सबैतिरका समुदायले काम गर्ने हो भने कमलामाई नगरपालिकाको विकास हुन समय लाग्ने छैन । (साभारः कमलामाई फिचर सेवा)
