आरडिटी परीक्षणमा नेगेटिभ रिपोर्ट आएपछि क्वारेन्टाइनबाट घर पठाइएका सर्लाहीका एक युवकमा पीसीआर परीक्षण गर्दा कोरोना संक्रमण भएको पुष्टि भएको छ ।
सर्लाहीको कबिलासी नगरपालिकाका ३५ वर्षीय युवकमा क्वारेन्टाईनबाट घर पठाइसकिएपछि पीसीआर परीक्षण गर्दा कोरोना पाजेटिभ देखिएको गाउँपालिकाका स्वास्थय शाखाका प्रमुख सञ्जय कुमार झाले जानकारी दिए ।
भारतबाट फर्केका ती युवकलाई नगरपालिकामा रहेको क्वारेन्टाइनमा १५ दिन राखेर आरडिटी परीक्षण गर्दा नेगेटिभ रिपोर्ट आएपछि घर पठाइएको झाले बताए । तर, एक हप्ता होम क्वारेन्टाइनमा बस्न भनेर घर पठाइएका युवकमा शंका लागेर गत जेठ ११ गते पीसीआर परीक्षण गरिएको थियो । उनको पीसीआर रिपोर्ट पोजेटिभ आएको झाले जानकारी दिए ।
ती युवकलाई फेरि नगरपालिकाको वडा नम्बर ८ अगर्वास्थित जनता माध्यमिक विद्यालयको क्वारेन्टाईनमै ल्याएर राखिएको छ ।
संक्रमितहरुको सँख्या बढदै गएपछि आइसोलेशनको व्यवस्था नभएकाले बाध्य भएर संक्रमित युवकलाई क्वारेन्टाईनमै राख्नु परेको स्वास्थ्य शाखाका प्रमुख झाको भनाई छ ।
आईसोलेशनको कमी भएपछि नगरपालिकामा भेटिएका ४० जना कोरोना संक्रमितहरुलाई क्वारेन्टाईनमै राखिएको उनले जानकारी दिए ।
उनका अनुसार उक्त क्वारेन्टाइनमा संक्रमण पुष्टि नभएका व्यक्तिहरुलाई पनि राख्नुपर्ने बाध्यता छ ।
