सिन्धुली: नेकपा एमाले सिन्धुलीका इन्चार्ज तथा केन्द्रीय सदस्य मनोजजंग थापाले राजाका नाममा झुठा पुलिन्दाहरु सार्वजनिक भइरहेको र त्यसको सिन्धुलीवासीले प्रतिरोध गर्नुपर्ने बताउनु भएको छ ।
नेकपा एमाले सिन्धुलीद्धारा आज आयोजित जागरणसभालाई प्रमुख अतिथिका रुपमा सम्वोधनगर्दे उहाँले धर्म र जातीका नाममा राजालाई ल्याउने झुठा पुलिन्दाहरु वाहिर आइरहेको बताउँदै गौरवमय इतिहास वोकेका सिन्धुलीवासीले त्यसको प्रतिरोध गर्ने उल्लेख गर्नुभयो ।
नेता थापाले सिंगो नेपाल र सिन्धुली निर्माणका लागि हाम्रा पुर्खाहरुले रगत बगाएको स्मरणगर्दै लोकतान्त्रिक गणतन्त्र स्थापनाका लागि सिन्धुलीको भूमिकाको प्रशंसा गर्नुभयो । लोकतान्त्रिक गणतन्त्र स्थापनाका लागि आन्दोलनको जगमा उभिएर सिन्धुलीका जनताले जुन भूमिका निर्वाह गर्नुभएको छ, त्यो गौरवमय इतिहासको रक्षा गर्ने सवालमा आफूहरु दृढतापूर्वक उभिएको बताउनुभयो ।
जनआन्दोलनले परास्त गरिसकेका पश्चगामी, पुनरुत्थानवादी र प्रतिगामीहरुलाई यो देशमा स्वीकार्य नुहुने बताउँदै नेता थापाले मल्लिक आयोगले दोषी ठहर गरेका नवराज सुवेदी, निरञ्जन थापा र ज्ञानेन्द्र शाहजस्ता मान्छेहरुलाई पुर्नस्थापना गराउने आन्दोलन अग्रामी हुन नसक्ने बताउनुभयो । यस्ता पश्चगामी र प्रतिगामीहरुको आन्दोलनमा सिन्धुलीवासी सामेल नहुने प्रष्ट पार्नुभयो ।
त्यसैगरी नेकपा एमालेका केन्द्रीय सदस्य गणेश पहाडीले नागार्जुनमा बसेका पूर्व राजा ज्ञानेन्द्र शाहलाई जेलमा पठाउनु पर्ने अबस्था आउन थालेको बताउनुभयो । जागरणसभालाई सम्वोधन गर्ने क्रममा पूर्वमन्त्रीसमेत रहनु भएका पहाडीले जनआन्दोलनको बलमा स्थापित भएको संघीय लोकतान्त्रिक गणतन्त्रका बिरुद्ध धावा वोल्नेहरु कानूनी रुपमा दण्डित हुने प्रष्ट पार्नुभयो ।
त्यस्तै एमालेका अर्का केन्द्रीय सदस्य विषमलाल अधिकारीले गणतन्त्र स्थापनाका लागि सिन्धुलीका अग्रजहरु ऋषिराज देवकोटा आजाद, दलवहादुर रजन मगर, दुर्गा सुवेदी, शेरमान कुँवरलगायतले रगत बगाएको बताउँदै कोही कसैले चाँहदैमा गणतन्त्र खतरामा नपर्ने बताउनुभयो । संविधानसभा सदस्यसमेत रहनुभएका नेता अधिकारीले जनताको बलमा स्थापना भएको गणतन्त्रका पक्षमा सिंगो सिन्धुली उभिएको प्रष्ट पार्नुभयो ।
अर्की केन्द्रीय सदस्य उमा कोइरालाले राजवादीहरुको अराजक गतिविधीलाई निस्तेज नपारेसम्म उनीहरुले टाउँको उठान खोज्ने बताउँदै गणतन्त्र पक्षधर सबै शक्ति एकै ठाउँमा उभिनुपर्नेमा जोड दिनुभयो ।
सिन्धुलीका ९ वटै पालिकाबाट जिल्ला सदरमुकाम आइपुगेका कार्यकर्ताहरुलाई स्वागतगर्दै नेकपा एमाले सिन्धुलीका प्रचार विभाग प्रमुख कर्ण घिसिङले गणतन्त्रका विरुद्ध उभिने जो कोहीलाई नछोडिने चेतावनी दिनुभयो । जिल्ला अध्यक्ष महेन्द्र देश श्रेष्ठले पूर्व राजा ज्ञानेन्द्रलाई देश निकाला गर्नुपर्ने बताउनुभयो । कार्यक्रमको सञ्चालन जिल्ला सचिव नवराज थिङले गर्नुभएको थियो ।
सिन्धुलीको माझीटार, लक्ष्मणचोक र धुराबजार शिरानबाट निकालिएको र्याली आजाद स्मृति भवनमा पुगेर बजार परिक्रमागर्दे कोणसभामा परिणत भएको थियो ।
