तीनपाटन गाउँपालिका अध्यक्ष कर्ण बहादुर थापामगरले चड्ने बा २ झा ३६७० नम्बरको गाडी बुधबार राती तोडफोड भएको छ । चुनाव नजिकिएसंगै भोट माग्न गएका थापाको गाडी तोडफोड भएको हो ।
वडा नं. ११ को सिमलचौरमा राती ९ बजे सडकमा गाडी रोकी खानपान सहितको टोल भेला गर्न पुग्नु भएका अध्यक्ष थापाको गाडीमा अज्ञात व्यक्तिले ढुंगा हानी गाडी तोडफोड गरेका हुन् । गाडीको अगाडीको भागको सिसा फुटेको छ ।
भेला सकेर फर्कदा गाडी तोडफोड भएको देखेपछि राती १०ः३० बजे प्रहरीलाई खबर गरेका थिए । प्रहरी उपरीक्षक विमलराज कडेलले प्रहरीलाई राती १०ः३० बजे गाडी तोडफोड भएको भनी खबर आएको र संलग्न व्यक्तिको पहिचान भै सकेको जानकारी दिनुभयो । यसैबीच अध्यक्ष थापाले गाडीमा तोडफोड भएको स्वीकारगर्दै मादक पदार्थ खाएर हिंड्ने व्यक्ति संलग्न भएको बताउनुभयो ।
प्रहरीले उक्त घटनाको आवश्यक अनुसन्धान गरि रहेको जनाएको छ । स्थानीयले सरकारी गाडीको दुरुपयोग गरि चुनाव प्रचार प्रसारमा लगेको आरोप लगाएका छन् ।
