जिल्ला सरकारी वकिल कार्यालयले समाजवादीका सांसद डा. सुरेन्द्र यादवलाई अपहरण गरेको भन्दै जाहेरी लिन अस्वीकार गरेपछि समाजवादीका नेता-कार्यकर्ताले कार्यालयअघि नै नाराबाजी सुरु गरेका छन्। त्यस्तै, डा. बाबुराम भट्टराई बिरुद्ध उजुरी दिन सरकारी वकिल कार्यालयअघि पुगेका विद्यार्थीहरुले पनि नाराबाजी सुरु गरेको छ।
आइतबार महानगरीय प्रहरी परिसर टेकुले उजुरी लिन इन्कार गरेपछि समाजवादीका नेताहरु मंगलबार किटानी जाहेरी दिन सरकारी वकिल कार्यालय पुगे पनि दर्ता गर्न आनाकानी गरेपछि उनीहरुले नाराबाजी सुरु गरेका हुन्।
कार्यालयबाट बाहिर निस्केपछि राजेन्द्र महतोले सरकारी वकिल कार्यालयले महेश बस्नेत, सर्वेन्द्र खनाल र किसान श्रेष्ठबिरुद्ध अपहरणको उजुरी लिन नमानेको र सरकारको निर्देशनबमोजिम नै यस्तो भएको दाबी गरे।
प्रहरी कार्यालयले जाहेरी लिन नमानेको खण्डमा उक्त बेहोरासहित जिल्ला सरकारी वकिलको कार्यालयमा जोहरी दर्ता गर्न सकिने मुलुकी फौजदारी कार्यविधि संहिता २०७४ को दफा ५ अनुसार समाजवादीका नेताहरु पुगे पनि राजनीतिक विषय भएकाले दर्ता गर्न अस्वीकार गरेको हो।
सरकारी वकिल कार्यालयले सात दिनको समय दिन आग्रह गरे पनि समाजवादीका नेताहरु तुरुन्तै दर्ता हुनुपर्ने अडान राखेका छन्।
समाजवादीका सांसद डा. यादवलाई पार्टी विभाजनका लागि प्रधानमन्त्री केपी शर्मा ओलीको निर्देशनमा नेकपाका सांसदहरु महेश बस्नेत, किसान श्रेष्ठ र पूर्वमहानिरीक्षक सर्वेन्द्र खनालले जनकपुरबाट काठमाडौँसम्म ल्याएका थिए।
उक्त प्रकरणलाई समाजवादीले अपहरण भएको भन्दै छानबिन गरेर दोषीमाथि कारबाही माग गर्दै आएको छ। जोहरी दर्ता गराउन जनता समाजावदीका नेताहरु राजेन्द्र महतो, उपेन्द्र यादव, केशव झालगायका नेताहरु पुगेका छन्।
यस्तै, जनता समाजवादीका नेता डा. बाबुराम भट्टराईविरुद्ध उजुरी दिन नेकपाका कार्यकर्ताहरु पनि जिल्ला सरकारी वकिलको कार्यालय गएका छन्।
बाबुराम भट्टराईले रेडियो नेपालसँगको अन्तरवार्तामा प्रधानमन्त्री केपी शर्मा ओलीलाई भष्मासुर भनेको भन्दै नेकपाका कार्यकर्ताहरु सोमबार साइबर अपराधमा कारबाही गर्न माग गर्दै महानगरीय प्रहरी परिसर पुगेका थिए।
तर आइतबार जस्तै प्रहरीले भट्टराईविरुद्ध उजुरी लिन इन्कार गरेपछि नेकपा निकट अखिलका अध्यक्ष ऐन मगरसहितका कार्यकर्ताहरु पनि सरकारी वकिल कार्यालय गएका हुन्।
