तालिवान विद्रोहीले आगामी ७२ घण्टाभित्रै अफगानिस्तानको राजधानी काबुललाई नियन्त्रणमा लिन सक्ने अनुमान अमेरिकी गुप्तचर निकायको एक ब्रिफिङले गरेको छ ।
गुप्तचर निकायको उक्त स्रोतलाई उध्दृत गर्दै सीएनएनले समाचारको पुष्टि गरेको छ । ‘तालिवानीले सम्भवतः एकसाताभित्रै अर्थात ७२ घण्टाभित्र तालिवानलाई एक्ल्याउन सक्छन् । तर, यसको अर्थ यो होइन कि उनीहरु राजधानभित्रै प्रवेश गर्न सक्नेछन्’ सीएनएनले लेखेको छ ।
यही सम्भावनालाई ध्यानमा राख्दै अमेरिकाले काबुलस्थित आफ्नो दूतावासलाई संवेदनशिल सामग्रीहरु नष्ट गर्न निर्देशन दिएको छ । ती सामग्री नष्ट नगर्दा तालिवानले प्रपोगान्डाको रुपमा प्रयोग गर्न सक्ने जोखिम हुने भएकाले यस्तो निर्देशन दिएको जनाइएको छ ।
तालिवानले रणनीतिक र व्यापारिकरुपमा महत्वपूर्ण दोस्रो ठूलो सहर कान्दाहारलाई कब्जामा लिएपछि अमेरिकाले उक्त अनुमान गरेको हो । तालिवान विद्रोहीले शुक्रबार एकैदिनमा ६ सहर कब्जा गरेका छन् । अफगानिस्तानका ३४ मध्ये १८ प्रान्तका राजधानीलाई तालिवानले कब्जामा लिएका छन् ।
तालिबानको आक्रमण तथा नियन्त्रण तीव्र गतिमा बिस्तार हुँदै गर्दा अमेरिकी सैनिकको पहिलो टोली अफगानिस्तान पुगेको छ । कूटनीतिक कर्मचारी तथा अरुलाई अफगानिस्तानबाट बाहिर लैजान सहयोग गर्नका लागि लागि अमेरिकी सैनिकको टोली पुगेको हो ।
अमेरिकाले शुक्रबार कूटनीतिक तथा अरु व्यक्तिहरुलाई उद्धार गर्नका लागि तीन हजार सैनिक पठाएको हो । उनीहरु सबै हप्ताभरमा फिर्ता हुने जनाइएको छ ।
अमेरिकाले काबुलमा रहेको आफ्नो दूतावासका कर्मचारीहरुलाई संवेदनशील कागजात तथा सामग्रीहरु ध्वस्त पार्नका लागि उपकरणको व्यवस्था गरिएको जानकारी गराएको छ । विपक्षीहरुले प्रोपोगाण्डाका लागि प्रयोग गर्न सक्ने सामग्री ध्वस्त पार्न उपकरण उपलब्ध भएको जानकारी अमेरिकाले गराएको हो ।
बेलायतले पनि बेलायती नागरिक तथा आफ्ना लागि काम गर्ने पूर्व अफगान कर्मचारीहरुको उद्धारका लागि ६०० सैनिक पठाउने तयारी गरेको छ । यस्तै जर्मनीले जस्तै निकै कम मात्रै कर्मचारीहरु दूतावासमा राख्ने तयारी बेलायतको छ । डेनमार्क र नर्वेले भने अफगानिस्तानमा रहेका आफ्ना दूतावास बन्द गर्ने तयारी गरेका छन् ।
ग्रामीण क्षेत्रपछि शहरी क्षेत्रमा पनि तालिबानले नियन्त्रण कायम गर्दै गर्दा विभिन्न देशले आफ्ना कूटनीतिक कर्मचारी तथा नागरिकहरुलाई फिर्ता लैजान हतारो गरिरहेका छन् ।
शुक्रबार तालिबान बिद्रोहीले लोघर प्रान्तको राजधानी पुल–ए–आलम नियन्त्रणमा लिएका छन् । सो शहर देशको राजधानी काबुलबाट ८० किलोमिटर मात्रै पर रहेको छ ।
संयुक्त राष्ट्रसंघका महासचिव एन्टोनियो गुट्रेसले अफगानिस्तानको अवस्था तीव्र गतिमा खराब बन्दै गएको र यसको प्रभाव गम्भीर हुने बताएका छन् ।
बढ्दै गएको हिंसाका कारण अहिलेसम्म दुई लाख ५० हजार भन्दा धेरै मानिस विस्थापित भएका छन् ।
अमेरिकीसहित नेटोसँग आवद्ध विदेशी सैनिकको अन्तिम समूह फिर्ता हुने क्रम जारी रहेसँगै तालिबानले आफ्नो पकड बिस्तार गरिरहेको छ । अगस्ट अन्तिमसम्ममा अमेरिकी तथा सेप्टेम्बर ११ सम्ममा सबै विदेशी सैनिक फिर्ता हुने तालिका छ ।
२० वर्षपछि अमेरिकीसँगै सबै विदेशी सैनिक फिर्ता हुने भएपछि तालिबानले गरिरहेको प्रभाव बिस्तारले मानवअधिकारको पक्षमा प्राप्त पछिल्लो प्रगति गुम्ने जोखिम बढेको छ ।
तालिबानले शुक्रबार अफगानिस्तानको दोस्रो ठूलो शहर कान्दाहार र त्यसको नजिक रहेको लश्कर गाह नियन्त्रणमा लिएको छ । यस्तै पश्चिमी क्षेत्रको हेरातमा पनि कब्जा जमाउन सफल भएको छ । अफगानिस्तानका एक तिहाई प्रान्तीय राजधानीमा तालिबानको नियन्त्रण छ ।
अमेरिकी रक्षा मन्त्रालय पेन्टागनका प्रवक्ता जोन किर्बीले पछिल्लो घटनाक्रम गम्भीर चासोको विषय रहेको बताएका छन् । तर राजधानी काबुल भने जोखिममा नरहेको दाबी उनले गरे ।
अमेरिकाको पछिल्लो गुप्तचर अनुमान अनुसार तालिबान बिद्रोहीले ३० दिन भित्र काबुल नियन्त्रणमा लिने प्रयास गर्ने छन्।
