सिन्धुलीको गोलन्जोर गाउँपालिकाले आफ्ना नागरिकहरुको जीवन रक्षाका लागि २४ सै घण्टा स्वास्थ्य सेवा दिने घोषणा गर्नुका साथै अक्सिजनसहितको ५ वेडको अस्थायी कोभिड अस्पताल पनि सञ्चालनमा ल्याएको छ ।
गाउँपालिका अध्यक्ष पुष्प कार्कीले दिएको जानकारी अनुसार गाउँपालिकामा २४ सै घण्टा खटिनेगरी डाक्टरसहित स्वास्थ्यकर्मीको टोली परिचालन गरिएको हो । कोरोना संक्रमण बढ्दै जाँदा गाउँपालिकाले अक्सिजनसहितको ५ वेड कोराना उपचारका लागि व्यवस्था गरिएको छ । गाउँपालिकाले स्वास्थ्यकर्मीका लागि एउटा गाडि र सर्वसाधारण नागरिकलाई ओसार पसारका लागि एउटा एम्बुलेन्स उपलब्ध गराईएको र उनीहरु सुचना आएकै आधारमा नागरिकको घरमैं पुगेर उपचार एवम् आवश्यक सहयोग गर्ने अध्यक्ष कार्कीले जानकारी दिए ।
उनका अनुसार गाउँपालिकाले डाक्टर र औषधीसहितको समूहलाई गाउँपालिका कार्यालयमा स्ट्याण्डवाई राखेको र कोरोना भाइरसको संक्रमणबाट कोही पनि नागरिकको ज्यान नजाओस् भन्ने उदेश्यले उनीहरुलाई परिचालन गरिएको हो ।
स्थानीय वासिन्दाले आफ्ना वडाध्यक्ष वा सिधै गाउँपालिका अध्यक्ष, उपाध्यक्ष लगायतलाई आफ्नो जीवन जोखिममा रहेको जानकारी गराएकै आधारमा डाक्टरसहितको टिम तत्कालै विरामीको घरमा पुग्ने व्यवस्था मिलाईएको हो । ‘हामी गोलन्जोरका जनताको जीवन रक्षामा प्रतिवद्ध छौं, कोरोना संक्रमण भएको आशंका लागे छ भने सूचना दिनुस् तपाईको घरमैं डाक्टर आउनु हुनेछ’ अध्यक्ष कार्कीले अगाडि भने । उनले पहिलो चरणमा डाक्टर चन्द्र राईको नेतृत्वमा १० जना स्वास्थ्यकर्मीलाई परिचालन गरिएपनि आवश्यक्ताका आधारमा बढाउँदै लगिने बताए ।
अध्यक्ष कार्कीले अप्ठेरो परेका नागरिकहरुलाई सिधै डाक्टर चन्द्र राई ९८४८९०७७८१ र अहेव तारा श्रेष्ठलाई ९८५४०४३८८१ मा सम्पर्क गर्न भनेकाछन् । गोलज्नोर गाउँपालिकामा हालसम्म २ जना कोरोना संक्रमित रहेको र १३ जनाको स्वाव संकलन गरिएकोमा रिपोर्ट आउन बाँकी रहेको अध्यक्ष कार्कीले जानकारी दिए ।
अशोक ठकुरी,ग्वाल्टार, सिन्धुली
