चर्चित गायिका तथा राष्ट्रिय सभाकी सांसद कोमल वलीले नेकपा प्रचण्ड–माधव समुहका नेता रघुजी पन्तबाट आफ्नो चरित्रहत्या गर्ने भएको भन्दै न्यायका लागि अदालत जाने बताउनु भएको छ ।
आफ्नो गृहजिल्ला दाङमा रहनुभएकी नेतृ वलीले पन्तको अभिब्यक्तिले सवै महिलामाथि आक्षेप लगाउने र चरित्रहत्याको प्रयास भएको भन्दै काठमाडौं फर्कनासाथ प्रहरी र अदालतको ढोका ढक्ढकाउने बताउनु भयो । ‘अहिले यो विषयमा सवैसँग सरसल्लाह गरिरहेकी छु, सबैले कानूनी प्रक्रियामा जान सुझाव दिनुभएको छ, काठमाडौं फर्केर यस बिषयमा आवश्यक निर्णय लिन्छु,’ राष्ट्रियसभा सदस्यसमेत रहनुभएकी नेतृ वलीले जनताटाइम्ससँग भन्नुभयो ।
नेकपा प्रचण्ड–माधव समुहका स्थायी कमिटी सदस्य पन्तले ओलीमाथि ‘साडी माथि उठाएर पिडुला देखाएर सांसद पद लिएको भन्ने आपत्तिजनक आक्षेप लगाउनु भएको थियो । पन्तको सो अभिव्यक्ति आफ्नो लागि मात्र नभएर सबै नेपाली महिलाहरुका लागि अपमानजनक रहेको नेतृ वलीले बताउनु भयो । पन्तको अभिब्यक्तिले राजनीतिमा लागेका महिलालाई हेर्ने दृष्टिकोण यसबाट प्रतिबिम्बित भएको उहाँको भनाई छ ।
‘उहाँबाट मैले यस्तो निकृष्ट सोचको कल्पना नै गरेको थिइनँ, यसमा म चुप लागेर बसेँ भने भोली अरु महिलाले पनि यसैगरी आरोपित बन्नुपर्नेछ, अपमानित हुनुपर्नेछ, चरित्रहत्याको सिकार हुनुपर्नेछ, त्यसैले म चुप लाग्दिन,’ वलीले भन्नुभयो ।
