कृषि तथा पशुपन्छी विकास मन्त्री धनश्याम भुसालले सिन्धुली जिल्लामा सलह किरा प्रवेश गरेको बताउँदै त्यसको रोकथाम र नियन्त्रणका लागि सचेत, सर्तक रहन र नआत्तिन आग्रह गर्नुभएको छ । प्रेस संगठन नेपाल सिन्धुलीले आज आयोजना गरेको पत्रकार भेटघाट कार्यक्रममा बोल्दै मन्त्री भुसालले वारा, पर्सा र रौतहट, सर्लाही र कपिलवस्तु जिल्लामा हिजो देखिएको सलह किरा पहाडी जिल्ला सिन्धुली र काभ्रेबाट आज अगाडि बढिरहेको खुलासा गर्नुभएको हो । हिजो साँझ कृषि ज्ञानकेन्द्र सिन्धुलीले सलह किरा सिन्धुली जिल्लामा नआएको बताएको थियो ।
सिन्धुली गढीमा सलहको हुल !
मन्त्री भुसालले जुनार सुपरजोनमा सलह रोकथाम र नियन्त्रणका लागि कुरा गरिरहेका बेला खनियाँखर्कमा सलहको बथान उडिरहेको थियो । कार्यालय भित्र रहनुभएका मन्त्री भुसालको आँखा बाहिर उडिरहेको सलहमा परेपछि त्यसलाई हेर्न सबैजना बाहिर निस्किएको बताइन्छ । कुराकानीपछि सिन्धुली सदरमुकाम तर्फ आउँदै गर्नुभएका उहाँले सिन्धुलीगढी प्रवेशद्धार अगाडि अर्को हुल सलह उडिरहेको देख्नुभएपछि उहाँले कोरोनाबाट थलिएका किसानहरुलाई यसले थप पिडा दिने बताउनु भएको थियो । त्यस लगत्तै उहाँलाई पाल्पाबाट सलहको हुल आएको सुचना प्राप्त भएको थियो ।
उदयपुर जिल्लाको धान रोपाई कार्यक्रममा सहभागी हुन त्यसतर्फ जाने क्रममा सिन्धुलीको कमलामाई नगरपालिकामा रोकिनुभएका मन्त्री भुसालले सलह नियन्त्रणका लागि आज बिहानै मात्रै कृषि बैज्ञानिक तथा विज्ञहरुसँग छलफल गरेको र नेपालमा प्रवेश गरेको सलहको अकार भारत र पाकिस्तान भन्दा कम रहेको बताउनुभयो ।
पत्रकार भेटघाटमा बोल्दै मन्त्री भुसालले सलह भगाउने उपाय पनि सिकाउनु भएको थियो । उहाँले आफ्नो खेतबारीमा सलह किराको बथान आएमा स्प्रेगर्ने, धुवाँ लगाउने र ठूलो आवाजमा माइक बजाएर त्यसलाई भगाएको विश्वको उदाहरण प्रस्तुतगर्दै अहिलेनैं नेपालमा त्यसबाट हुने क्षतिको आँकलन गर्न नसकिने उल्लेख गर्नुभयो ।
७५३ वटै स्थानीय निकायलाई बलियो र सम्पन्न कृषि सेल निर्माणमा जोड
कृषि उत्पादन, भण्डारण र बजारीकरण कृषि मन्त्रालयको नभई सम्बन्धित नगरपालिका र गाउँपालिकाको भएकाले स्थानीय सरकारलाई बलियो बनाउन जरुरी भएको उहाँको भनाई थियो । विउ विजन, उत्पादन र भण्डारण स्थानीय निकायको अधिकार हो, त्यसैले हामीले ७५३ वटै स्थानीय निकायलाई बलियो र सम्पन्न कृषि सेल निर्माणमा जोड दिएकाछौं, त्यो कृषि मन्त्रालयको स्थानीयकरण पनि हो, मन्त्री भुसालको भनाई थियो । यस वर्ष ३ लाख मेट्रिक टन धान सरकारले खरिद गर्ने र त्यसको भण्डारण र बजारीकरण मुल्य श्रृंखलाका आधारमा गरिने बताउँदै उहाँले अहिले बजारीकरण मुख्य चुनौती रहेको उल्लेख गर्नुभयो ।
एमसीसी वारे कार्यदलको निश्कर्षनैं अन्तिम निर्णय
मन्त्री भुसालले मिलेनियम च्यालेन्ज कर्पोरेशन एमसीसी परियोजनालाई यथास्थितिमा पारित नर्ग नहुने बताउनुभयो । जारी पार्टी सचिवालय बैठकले एमसिसी अनुमोदन गर्न लागेको हो ? भन्ने प्रदेशखबर अनलाईनको जिज्ञासामा मन्त्री भुसालले भन्नुभयोः पार्टी केन्द्रले गठन गरेको कार्यदलले गरेको निर्णयनैं अन्तिम निर्णय भएकाले पार्टी सचिवालयले त्यसैलाई मानेर जानुपर्छ, अर्को बिकल्प छैन ।
सो कार्यक्रममा कमलामाई नगरपालिकाका प्रमुख खड्गवहादुर खत्री, प्रवक्ता कर्ण घिसिंग, प्रमुख प्रशासकिय अधिकृत पुरुषोत्तम सुवेदीलगायतको उपस्थिति रहेको थियो भने प्रेस संगठनका जिल्ला अध्यक्ष वुद्ध उच्छामीले कार्यक्रमको सञ्चालन गर्नुभएको थियो ।
