रौतहटमा क्वारेन्टाइनमै एक स्वास्थ्यकर्मीमाथि बुधबार कुटपिट भएको छ।
रौतहटको राजपुर नगरपालिकामा रहेको क्वारेन्टाइनमा नगरपालिकाकै स्वास्थयकर्मी खुरसेद आलममाथि कुटपिट भएको हो।
नगरपालिकाको वडा नम्बर ९ को क्वारेन्टाइनमा रहेका ब्यक्तिहरुको आरडीटी परीक्षण गर्नको स्वाब संकलनन गर्न गएको बेला आलम माथि स्थानीय एकजनाले आक्रमण गरेपछि क्वारेन्टाइनमै रहेका अन्य व्यक्तिहरुले समेत कुटपिट गरी घाइते बनाएको नगरपालिकाका मेयर मोहम्मद शकिल अख्तरले जानकारी दिए।
आक्रमण गर्ने व्यक्तिको नातिमा कोरोना संक्रमण पुष्टि भएको र उनले त्यही रिसमा स्वास्थयकर्मी आलममाथि आक्रमण गरेको हुनसक्ने मेयर अख्तरले बताए।
‘स्वास्थ्यकर्मीको टोली आरडीटी परिक्षण गर्नको लागि क्वारेन्टाइन गएका थिए, त्यही बेला एक जना स्थानीयले स्वास्थयकर्मी आलम माथि आक्रमण गरे,’ मेयर अख्तरले भने, ‘पछि त क्क्वारेन्टाइनमा रहेकाहरुले समेत कुटपिट गर्न थाले।’
स्थानीय र क्वारेन्टाइनमा रहेका ब्यक्तिहरुको कुटपिटबाट आलमको टाउको फुटेको तथा उनको टाउकोमा ५ वटा टाँका लगाइएको मेयर अख्तरको भनाइ छ। मेयर अख्तरका अनुसार प्रहरी हुदाहुदै पनि कुटपिटमा संलग्न रहेका स्थानीय ती ब्यक्ति फरार भएका थिए।
आरडीटी परीक्षणको लागि स्वाब संकलन गर्नको लागि गएका ९ जना स्वास्थ्यकर्मीहरुको टोली सित क्वारेन्टाईनमा रहेका ब्यक्तिहरुले आफूहरु चेकजाँच नगराउने भनी बिबाद गरेका थिए।
सोहीक्रममा उनीहरुले आलममाथि आक्रमण गरी उनको टाउको फुटाएका हुन्। पछिल्लो समय रौतहटको बिभिन्न स्थानहरुमा कोरोना संक्रमित भेटिँदै आएका छन्। यसमध्ये राजपुर नगरपालिकामा समेत संक्रमितहरु भेटिएका छन्।
